ആലത്തൂർ: പഴമ്പാലക്കോട് പൂട്ടിയിട്ട വീട്ടിൽ പട്ടാപ്പകൽ നടന്ന മോഷണത്തിൽ ഏകദേശം 10 പവൻ സ്വർണവും 90,000 രൂപയും നഷ്ടപ്പെട്ടതായി പരാതി.
പഴന്പാലക്കോട് താനത്ത് വീട്ടിൽ ടി.കെ. ജോയിയുടെ വീട്ടിലാണ് മോഷണം നടന്നത്. ഇന്നലെ ഉച്ചയ്ക്ക് 1.30 നും 2.30 നും ഇടയിലാണ് സംഭവം.
ജോയിയുടെ ഭാര്യ അവരുടെ വീട്ടിൽ പോയിരിക്കുകയായിരുന്നു. അവരെ വിളിക്കാൻ 1.30 ന് ജോയി വീടുപൂട്ടി താക്കോൽ രഹസ്യസ്ഥലത്തുവച്ച് പോയതാണ്. ഒരുമണിക്കൂറിനകം ഭാര്യയെ കൂട്ടി തിരിച്ചുവന്നപ്പോൾ വീടിന്റെ വാതിൽ തുറന്നുകിടക്കുന്ന നിലയിലായിരുന്നു.
പരിശോധനയിലാണ് കിടപ്പുമുറിയുടെ അലമാരയിൽ സൂക്ഷിച്ചിരുന്ന ആഭരണവും പണവും നഷ്ടപ്പെട്ടതറിഞ്ഞത്. ജോയി ആലത്തൂർ പോലീസിൽ നൽകിയ പരാതിയിൽ കേസെടുത്ത് അന്വേഷിച്ചുവരുന്നു.